حفرتلي 101

أول كورس طبعا رح يكون حفرتلي 101 اللي هو رح يكون "المدخل الى علم الحفتلة" و طبعا رح تشمل البيسكس و الاساسيات

نبدأ أولا

بتعريف الحفرتلي:0 *
الحفرتلي هو مصطلح حفرتلي بحد ذاته و الشخص الحفرتلي هو الشخص الذي يحاول جاهدا أن يصبح فايع و كوول و ستايل بجميع مجالات الحياة .. بس يا حرام قلبت معه عكسي.0

اهداف الحفرتلي (على سبيل المثال و ليس الحصر):0 *
اول هدف عنده هو انه يحس انه اشي كبير و بكون مو مصدّق حاله و شُغل "يا أرض إشتدّي ما عليكي حدا قدّي"0
.

ثاني هدف هو تزبيط البنات والعرط فيهم و عليهم

.

ثالث أهدافه يشتري لحاله موبايل جديد فيو بلوتوث مشان يقدر يزبط البنات بأي قعدة أو مكان متجمّع فيو بنات عالبلوتوث
.

رابعا و ليس آخراً شراء باص هيونداي أو كيا من اجل التزبيط

أدوات الحفرتلي (عدّته اليومية):0 *
بوكيت (باكيت) دخّان ماركة فايسروي أو إل إم

(LM)

أو باكيت مارلبورو أحمر بس جوّاته سجاير فايسروي أو توب توينتي , بكون مطلعه شوي من الجيبة مشان يبيّن
.

تلفون خلوي (موبايل) ما فيو رصيد أو فيو بس 8 قروش مشان يقدر يرن رنّة و يسكّر عصحابه و صاحبته
.

ميدالية مفاتيح لمّيعة و معبّاية كثييييير مفاتيح ما الهم داعي و حتى ما الهم أبواب أو زرافيل
.

قدّاحة أبو ظو مشان انها ستايل و فايعة و مشان تظويلو بالليل و يقدر يشوف خزق زرفيل الباب بس يروّح عوجه الفجر
.

مسبحة بظل يلولح فيها إنه فايع أو يعمل حاله بسبّح و هو بطقطق بخرزاتها بأصابعه – "مشان دين و دُنيا"0
إذا ما كانت مسبحة بكون معه سنسال (طوق) كارتيير

(Cartier)

خميل ابو 25 ليرة مشان انه يعني دفّيع و معه مصاري (شغل عرط يعني) بضلّو يلولح فيه و يلفّه على اصابعه و يفلّته
برضو إذا ما توافر سنسال الكارتيير بسلّك حاله بجنزير سدادة البانيو أو المغسلة (ابو جلول) – أكيد عرفتوه
.

نكاشة سنان بظل ماسكها ينكّش سنانه فيها أو مسواك و بالأغلب بتكون مسواك (سواك) برضو مشان دين و دُنيا
.

اماكن تجمع الحفرتل:0 *
عادة تجد الحفرتل باماكن تواجد أو تجمع البنات مثل:0
الجامعات
المقاهي
مكة مول
شارع الحمرا بالصويفية
عند مدارس البنات
دوار عبدون
بوابات كلّيات المجتمع
البلد – الساحة الهاشمية
مجمع العبدلي (خاصة قريب من باصات حجازي) مشان البنات اللي جايين من اليرموك و التكنولوجيا
عند هارديز و برغر كنج و ماك
مخفر صويلح/زهران/ضاحية الرشيد/البيادر/مرج الحمام/ناعور الخ من المخافر
شارع الاردن – عند مطل البقعة
شارع المطار – بين وزارة الخارجية و جامعة الزيتونة

.

هون بنكون خلّصنا كورس حفرتلي 101 بنشوفكم بعدين بكورس حفرتلي 102 مع زميلي أبو شركس السرسري انشالله